ឆ្នាំរោងនឹងជំនួសដោយឆ្នាំម្សាញ់ (ពស់) ធាតុទឹក ដែលមានទេវតាឈ្មោះ ស៊ី ស៊ុន ក្នុងពេលឆាប់ៗនេះ។ បើតាមហោរាចិន បានឲ្យដឹងថា សត្វពស់នេះ មកពីទន្លេទឹកសាប សម្រាប់កម្ពុជា អាចមានកន្លែងខ្លះ រាំងស្ងួត ខ្លះទៀតទឹកជំនន់ ប៉ុន្តែចំពោះសន្តិសុខសង្គមមិនមានបញ្ហាអ្វីទេ ។
លោកគ្រូ ចាំង ហាំឡុង វ័យ ៦៤ឆ្នាំ ហោរាទស្សន៍ទាយតាមក្បួនចិន បានឲ្យដឹងថា ឆ្នាំម្សាញ់នេះ ឆុងខ្លាំងជាងគេអ្នក មានធាតុភ្លើង ពិសេសអ្នកកើតឆ្នាំខាល (ខ្លា) គឺ សារឆុង ឆ្នាំកុរ (ជ្រូក) ឡាក់ឆុង និងឆ្នាំម្សាញ់ជាន់ឆ្នាំ។ ដូច្នេះតាមទំនាយរបស់លោកគ្រូ បានឲ្យដឹងថា អ្នកកើតឆ្នាំទាំងបី សូមកុំទៅការដ្ឋានសាងសង់ ចូលរួមបុណ្យសព កុំមើលគេសែនអាពាហ៍ពិពាហ៍ និងកុំចូលជួយរៀបគ្រែបន្ទប់កូនកំលោះក្រមុំផ្សំដំណេក ប្រយ័ត្នមានគ្រោះថ្នាក់។
លោកគ្រូ ក៏សូមផ្ដាំផ្ញើដល់អ្នកកើត ឆ្នាំកុរ ឆ្នាំខាល និងឆ្នាំម្សាញ់ សូមប្រយ័ត្នគ្រោះថ្នាក់ចរាចរណ៍ ។សម្រាប់អ្នកកើតឆ្នាំកុរ អាយុ ១៩ឆ្នាំ និងឆ្នាំម្សាញ់ អាយុ ៤៨ឆ្នាំ ឆុងខ្លាំងជាងគេទាំងអស់ ចំណែកឯអ្នកកើតឆ្នាំខាលអាយុ ៦៨ និង ២៨ឆ្នាំ ប្រយ័ត្នបញ្ហាសុខភាព។
លោកគ្រូ បានបង្ហើបពីពិធីបញ្ចៀសឆុងផងដែរថា បងប្អូនអាច ទៅយកសាច់ជ្រូក ៣ជាន់ ១ខាំ និងពងមាន់ទៅថ្វាយតាមកន្លែងអ្នកតា មួយចំនួន ដូចជាអ្នកតាប្រចៅនៅលើវត្តភ្នំ អ្នកតាចិននៅតាខ្មៅ និងអ្នកតានៅក្បែរស្តាតអូឡាំពិក ដោយយកសាច់ជ្រូកដាក់នៅក្នុងមាត់ខ្លា និងគោះពងមាន់បំបែក ដើម្បីកាត់ឆុងចេញ។ ម្យ៉ាងទៀត អាចយកស្លឹកទទឹមលាយទឹកមុជក៏បាន។
ឆ្នាំដែលរាសីឡើង សមប្រកប (យីអ៊ុនឡើងខ្ពស់) ក្នុងឆ្នាំម្សាញ់នេះ គឺឆ្នាំ រកា វក ជូត ឆ្លូវ និងឆ្នាំរោង។ ចំពោះឆ្នាំរកា ចូរប្រយ័ត្ននៅខែមីនា មិថុនា និងកញ្ញា រាសីមិនសូវល្អទេ អាចជួបគ្រោះថ្នាក់ចរាចរណ៍៕
Source : Sabay